發現我之前寫3件好事, 原來只寫到第二件 ...
當然到今日已經唔只做咗3件好事咁少啦! 但第三件嘅好事... 對於零EQ嘅我, 係難度超高嘅!
回到09年8月兩老嚟咗慕尼黑探我哋, 奶奶發現我屋企有好多來自法蘭西嘅東東, 竟然話"羨慕我, 因為佢一次都未去過"????
我以為我聽錯!! 因為我係知道佢好鍾意法國嘅, 而由英國去法國, 咪同去深圳一樣咁易??!! 過去20年, 兩老都不斷去意大利同希臘渡假, 一個英國婦人想去巴黎去唔到??!! 我覺得呢件事實在太匪夷所思同唔應該嘞!!! 我忍唔住啤住呀老爺大人問: "點解你老婆咁想去, 你幾十年都唔帶佢去??好難咩?" 佢嘅解釋就只係一句"最憎法國人!!" 我 : "法國人都唔鍾意你, 但你老婆想去, 依家買機票, 聽日我同你哋去!!"
當然呀老爺大人唔會咁順灘啦, 搬出一堆廢話! 但我有見到奶奶兩眼發光, 咁即係佢仲好想去啦! 自嗰日開始, 我又一有機會就提起呢件事, 終於一年之後... 2010年08月....
奶奶好明顯地開心到變返做細路女咁!!
突然行路超快, 望少眼就唔見咗!! 夜晚又唔肯返酒店, 有一晚兩老自己係酒店附近嘅cafe蒲到3點幾!!! 
奶奶活力十足, 度度都想去, 老爺大人就照舊彈三彈四!!
度度都話唔去!!! 整個星期, 日日都要又鬧又氹咁, 超煩!!!! 
好似有日....
我話比奶奶知鐵塔夜晚會著燈+bling bling, 佢又雙眼發光!
咁夜晚去睇啦... 因為唔知幾點天黑, 首先我哋去咗凱旋門附近飲嘢, 點知天黑一埋單, 老爺大人突然話自己老呀, 咁夜(10點幾)行唔到呀...... 即係佢無興趣唔想去啦! 
呀奶奶即刻down晒, 但賢妻嘅佢, 緊係話無所謂返酒店, 但佢口就扮委屈, 眼就望住我, 即係又要我出聲啦! 發覺奶奶都幾識利用我... 我本來想好聲好氣, 點知呀老爺大人無端端超惡鬧奶奶, 由要嚟巴黎開始鬧, 我一手拖走奶奶, 之後返轉頭叫佢收聲, 叫佢一係自己揾間cafe坐喺度等我哋, 一係就收聲跟住行,我話搭的士咪唔駛行, 一係折部的士送佢返酒店...
擾攘咗好耐佢就死死地氣話搭metro去...一路行去metro, 佢一路自言自語係度扮攰!! 要留意奶奶同佢個仔一句說話都唔講架, 淨係不斷望住我, 擺我上枱!!! 
當去到見到bling bling鐵塔, 呀奶奶笑到成個小朋友咁, 老爺大人就立即扮晒friend, 又話要一齊影相, 又話要多謝我同佢嚟巴黎, 又話best trip ever... 頂!
睇完之後, 扮攰嗰個就醒晒! 話嚟玩無理由咁早瞓, 要去揾地方再飲過!!!
無論我幫奶奶實現咗幾多個願望, 呀老爺大人嘅難頂程度係唔會變嘅! 而我亦無心情再扮有耐性, 所以今年8月兩老又嚟咗慕尼黑渡假一星期, 我就逃走咗!
只係應酬咗佢哋1日, 就同女友人去咗南法同陽光海灘玩遊戲! 
