慕尼黑 ｏ Isar

我家樓下嘅Isar河, 除咗有個靚靚玫瑰園, 其實一年365日, 無論任何時間都係爆晒人嘅!
我諗因為慕尼黑無海灘, 加上我家呢段河係市中心, 所以一到夏天, 就變成游水...

後面座building就係德國博物館....

BBQ.... 梳化都帶埋嚟, 好識嘆!!! 有時仲有人扎營...

同曬太陽嘅勝地!! 呢度唔係天體區, 但裸曬人周圍都係! 有時見d裸曬男BBQ, 好替佢擔心!

Isar一直到奧地利, 沿住河邊行, 風景不錯!

大量紫色小花...

有次行行吓, 不停見有嘢閃過, 以為青光眼, 原來係好細隻藍青蜓...

仲有大量呢d菇... 唔知食唔食得架呢?

幸福的一家四口!

每隔20分鐘到就有beer garden.... 連水都唔駛帶!

行到見到鐵絲網, 就知到咗動物園啦!

會望到羊同鹿... 佢哋要避開動物園入面d細路, 通常都貼近鐵絲網, 所以係出面望得仲清楚!

動物園出面有條橋...

又有鎖, 但就無科隆咁壯觀!!

過咗動物園無幾遠有個水霸, 附近有d水流好急嘅位....

有人滑浪....

有人玩急流...

連木伐都出埋!!!!

呢條可真係乜都有, 到咗冬天就會變成滑雪場, 真係每日行過都有新奇事, 我覺得應該列做景點之一!! 大家去開博物館, 記住行吓啦!

Düsseldorf ｏ 日本城

Düsseldorf... 我覺得又係唔啱外國人千里迢迢嚟去旅遊嘅! 但住附近嘅, 嚟過一個weekend都幾好! 尤其如果你住嘅地方無乜亞洲嘢, Düsseldorf簡直係天堂! 我就直情想搬過去住!!!
Düsseldorf係歐洲最大的日本人聚居地, 由火車站一行出去就係日本區!
睇吓Düsseldorf張map超細...

但都有註明日本區...

真係會以為自己係日本!!! 除咗大量餐廳....

連日本酒店Nikko、麵包店、茶室、漫畫,magazine,書店... 到日式按摩都有!!!

2大間日、韓supermarket!

我一入到去已經嘩嘩聲! 唔捨得走! 好多嘢慕尼黑都無架!

連魚檔都有! 好幸福呀!

係香港時超愛呢枝洗頭水, 好想買晒佢呀!

洗頭水咁重無謂買, 但就買咗勁多雪糕! 呢個最好味!!

連貼紙相都有得影!

呢間拉麵係超多人推介架! 話正宗都不得了! 我晚飯同lunch時間都見大量日本人排長龍!

我唔食拉麵, 過對面食壽司! 好食仲要超平!!! 但我諗d日本人食壽司有私竇, 得一枱日本人, 其他都係鬼鬼!

真係好想搬去住呀! 除咗日本區無得頂, Düsseldorf行街食飯都一流! 淨係舊城區就有260間餐廳慢慢揀, 又有靚啤酒! 行街方面, 新城區有晒各大品牌, 連我愛嘅A&F都有!

仲有好多museum、art gallery... 連芥辣都有museum!

佢哋都係度!

最最最無敵嘅係萊茵河邊呢個赤柱feel...

又有galleries, 仲有大量餐廳/bar .....

係咪無得頂先??!! 真正嘅遊客景點欠奉, 但嚟hea吓同住就一流嘞!