意大利 ｏ Lake Garda

其實上年已經去過一次Lake Garda, 不過全程滂沱大雨, 唔忿氣所以今年再去一次....！不過今年都係陰天+超大霧, 唔熱, 啱晒我! 不過其實都無咩好寫, 只係一個好"遊客"嘅地方!
平時好怕有BB坐我附近, 今次仲要係劃咗位, 想調位都唔得, 好彩今次呢位親善大使, 一見到人就錫, 一有人落車就講byebye, 氹到全火車嘅人都好開心! 不斷同佢玩, 時開好快過!

成日都覺得Lake Garda個外型好似......

只有Desenzano同Peschiera有火車站, 我哋揀咗Desenzano做基地, 每日坐船去唔同站....

好似有3種船, 呢種可以載埋車, 最慢但最好! 尤其要影相嘅, 可以上上落落, 任何角度都得!

成個Lake Garda去晒, 我個人只鍾意Limone, 其他覺得都不值一提, 連相都無乜影...
酒店喺正碼頭對面, 以為可以好他條, 但大家要知道意粉人嘅工作效率, 得四、五個人嘅隊, 可以排20分鐘以上.....

每個站都有個城堡, Desenzano就最揾笨, 雖然入場費只係€1 , 但行上幾層樓之後, 所有地方都有超污糟玻璃封住, 唔駛1分鐘就走咗lu....

反而城堡門口仲望得清楚, 但超大霧.... 唔知點解我諗起西貢!

我諗Lake Garda係有錢人去渡假嘅地方, 尤其係Desenzano, 男仕都係靚恤衫+皮鞋, 每一個女子都會拎住個名牌袋, 著超高高踭鞋 .... 只有我同朋友仔係背囊+波鞋.... 見到d女子上船落船真係高難度動作, 連之後上雪山, 佢哋都著高踭鞋架喎!!! 勁呀!
其實leggings真係唔好當面褲著啦!!

意大利, 仲要湖邊, 食嘢緊係一流啦! 我無影相, 費事比人笑嘛....
但有一晚食呢個白酒煮青口+大蜆...

其中一隻青口入面有BB呀!!!! 隻BB青口痴住塊肉同個殼架....得手指尾甲咁大, 好可愛架!!!!

我唔知青口點生BB, 可能只係咁啱痴住咗???? 我無食佢呀! 太可愛嘞!!



待續.......