安樂晒!

為咗續passport嘅事擔心咗一排, 因為喺德國, 只有柏林嘅加拿大領事館會issue護照, 一直擔心郵寄途中會寄失, 但又無理由飛去柏林等, 又驚我6月頭去瑞士之前收唔到, 雖然之前去幾次都無check 護照, 但萬一今次黑仔, 就會做咗非法移民.... 好煩!! 好煩!!!
估唔到慕尼黑嘅加拿大領事館效率其高, send email去問嘢, 10分鐘內回覆﹔我無guarantor, 要揾領事簽名, 一上去超nice嘅領事姐姐即幫我搞, 仲對好晒資料, make sure我無填錯嘢, 又寫咗張字條比我去郵局寄掛號, 等我唔駛同郵局d人雞同鴨講...
原本諗住會無乜人啦, 點知都有幾個人比人偷咗passport, 有一個仲趕住去美國開聯合國會議, 佢好傍偟呀, 因為佢唔識去影相嘅地方, 我話叫佢等我, 我帶佢去啦! 但佢太趕, 又唔知我要等幾耐, 最後佢自己拎住職員畫比佢嘅地圖走咗! 最後我10分鐘之後就走得啦, 唔知佢最後有無揾到呢?!
加拿大passport相好煩! 除咗指定size, 仲要影相舖蓋印, 慕尼黑只有一間指定嘅影相舖, 亦因為得一間, 所以焗住比佢搶! 影德國passport相€5 , 加拿大passport相就要€20 ...
領事館好彩係正市中心, 車都唔駛搭!

超細, 就係得張相見到咁大....

我上星期三到尋晚去咗第二度玩, 尋晚返嚟打開郵箱, 有2個包裹係鄰居度, 諗咗成晚可能本passport到咗?! 夜得滯又唔可以去敲人哋門, 不安咗一晚...
點知今朝一早有人按門鐘....

真係超好彩!!! 返遲一日就會miss咗! 上星期一先寄去柏林, 估唔到咁快就搞掂!!!

安樂晒!!!!!!!!!