長頸鹿

揾到有人同我一樣鐘意長頸鹿, 等我講吓我有幾鍾意啦!
以前住多倫多, 男友家就喺Toronto zoo 附近, 我哋買年票, 差不多每一、兩個星期就會去一次! 每次我去望一望都會好開心! 去得多, 長頸鹿管理員認得我哋, 佢有時間嘅話會講我知嗰個星期d長頸鹿發生過咩趣事! 我有因為呢個管理員哥哥, 一度諗住大學去讀Zoology , 不過我數唔得無得讀....
嗰一段時間, 我會成日開住一個動物園嘅giraffe cam... 一路做工課一路望吓!! 嗰時個cam好似係澳洲定南非動物園嘅, 有時差, 要好似同男友玩long-d 咁!! 即使蒲完半夜三更都會望下先瞓!! 當年係未有無限寬頻嘅, 喺屋企上網又貴又慢, 好彩大學嘅connetion平少少!
揾唔返嗰page.... 類似呢個咁!
http://www.chesterzoo.org/must-sees/web-cams/giraffe-cam

每次去旅行都必定會去動物園探長頸鹿, 08年原本plan咗去南非, 但突然要搬嚟歐洲所以改咗去西班牙, 好可惜呀! 但其實我超怕熱.. 南非我諗我會頂唔順!!
所有人知我鍾意長頸鹿, 每次收禮物當然會唔少得啦! 衫褲鞋襪、傢俱乜都有! 好朋友仲織咗一條長鹿頸紋頸巾比我! 唔捨得用呀!
香港一屋都係長頸鹿... 嚟咗一年多, 又有佢哋....

之前見samwei整長頸鹿瑞士卷 , 我當時應該個未整過蛋糕架!! 一見到嗰原食譜d相, 即刻走去買嘢整!
係樣衰d, 但第一次整ok啦! 好好味架!!

同朋友仔第一次去倫敦旅行買嘅.....

之後去巴黎買嘅, 2樣我鍾意嘅嘢喺一齊...

呢個係一個舊同事寄比我嘅禮物, 仲有一隻寫住"鐘意長頸鹿必看"嘅DVD...原本好開心, 一play隻碟, 就見到一隻無皮嘅長頸鹿係手術枱上面, 我即刻熄機呀!! 頂! 原來喺national geographic嘅長頸解剖programme , 嚇到我嗰晚發惡夢呀!! 佢話諗住我會鍾意睇喎!

仲有好多好多..... 影唔晒!!