laab gai 泰式辣雞沙律

Laab gai .... 中文係咪應該譯做泰式辣雞沙律呢???

Laab gai 係朋友仔嘅至愛!

可惜.... 喺慕尼黑食唔到正宗嘅!!!

跟過好多流料去試d所謂好得嘅, 但唔知究竟係我要求高呀?

定係其他人未去過泰國... even九龍城?

我覺得呢度d泰國餐館... 仲衰過中國餐!

即使唯一一間叫做正宗少少嘅, 都懷疑因要快, 會變咗用大火炒, 變咗有鑊氣, 好味但點都唔一樣!

朋友仔好想食, 我唯有出手啦!!!

其實Laab gai超易整... 又一滴油都唔駛, 好味又健康!!

材料:
雞胸肉 (搞碎)
紅葱頭(shallots)
魚露
青檸汁
乾辣椒碎
沙薑粉(galangal powder ) 炒米粉
薄荷葉

做法:

唔駛落油, 將雞胸肉用中火慢慢煮熟 (千祈唔好貪快開大火!!!), 應該會有少少肉汁嘅, 但如果太乾就加少少水...

雞肉一熟, 熄火! 立即加入紅葱頭, 撈勻.

加魚露+ 青檸汁 .... 逐少加入, 試味直至你喜歡嘅味道! (例如我就加咗2個青檸嘅汁, 同3湯匙魚露)

撈入沙薑粉 (呢個係optional... 唔加都得嘅!)

再加炒米粉... (呢個一定要!!) 炒米粉除咗香味, 作用係thicken個汁嘅, 要視乎你要幾多汁.... (我就通常落1大湯匙)

最後加入乾辣椒同薄荷葉 .... 搞掂!

配糯米飯或生菜....

每次出街食, 一見到係炒嘅、無汁嘅、或者無薄荷葉嘅... 就知錯晒!!!

薄荷葉同炒米粉同樣重要! 我嘅係自家種嘅...

炒米粉其實我指 roasted rice powder (khao kua) !!

我通常自製! 泰國人教一定要用糯米!!!

做法好簡單:

只要半杯糯米 (一次唔好整太多, 半杯已經可以用幾次, 放太耐無晒味! )
放落鑊用中慢火慢慢烘至啡色, 不時炒2吓, 等2面都受熱....
一定唔可以心急, 用大火外面啡咗, 入面唔熟,
大概10分鐘, 唔駛太啡嘅, 會苦!
千祈唔好用手掂, 超熱架!
放涼之後就磨粉, 我就覺得唔駛磨到太幼嘅....
好似用手磨又會香D.... 但我無嗰舊嘢, 用機都OK啦!

磨好仲可以沖杯即磨炒米茶!!!